Літургічныя тэксты

для беларускамоўнага багаслужэння

24 сентября / 7 октября Преподобного отца нашего Леонтия (Карповича), архимандрита Виленского, исповедника (служба, цсл).

24 сентября / 7 октября

ПРЕПОДОБНАГО ОТЦА НАШЕГО ЛЕОНТИЯ, АРХИМАНДРИТА ВИЛЕНСКАГО, ИСПОВЕДНИКА

Творим бдение.

НА МАЛОЙ ВЕЧЕРНИ

Стихиры на «Господи воззвах», глас 8-й:

Се предыде пред узники / и страдальцы за веру православную / предводитель в терпении, предшественник в святости, / новый дивный златоустый учитель и душепопечитель – / преподобный исповедник Леонтий. / Послужив бо много со дерзновением опечаленному народу нашему, / оплот Православия явися // и венец нетления унаследи.

Отче Леонтие, / велиим христианом уподобился еси неложно, / с древними истинными богословами единомыслие обретши // и венец славы о деяниях с ними восприял еси.

Преподобноисповедниче Леонтие, / деятельный печальник православнаго народа показался еси,/ темже в Небéснем Царствии // светло о Господе ликуеши

Благовествуя мир слепотствующим в вере / о Православии ревностию, / трудолюбием, молитвою, любовию и милосердием, славный Леонтие,/ воистину явился еси чадо // и наследник Царствия Небеснаго

Слава, глас 5-й:

Благовествуйте пределы Пинския и Виленския радость велию / – звезда бо новая возжеся над вами: / восста Леонтий преподобноисповедник в сонме небеснем / с мучениками литовскими, Афанасием Берестейским, Андреем и Макарием Пинскими / и сияет Святей Троице сердцем верным и чистым / о Любви неизреченной Божьей вовеки // воспевая Дивнаго во святых своих.

И ныне, глас той же:

Входа нет. Прокимен дне.

Стихиры на стиховне, глас 1–й:

Отче Леонтие, / кладезю веры предивный, / любви и милосердия реко, / молися о нас ко Господу, / да безчувственныя души наша / оросятся Божией милостию, // по твоим, святе, молитвам.

Стих: Праведник, яко финикс, процветéт,/ яко кедр, иже в Ливане, умножится.

Отче Леонтие, / небо и земля удивися терпению и служению твоему: / како возможе человек плотский пожити ангелом подобно, // молися дароватися нам ревности по Бозе.

Стих: Насаждéни в дому Господни,/ во дворех Бога нашего процветут

Пребыл еси неколеблемо, преподбноисповедниче, / во благовестии и твердости о Христе и вере православней, / молися убо, адаманте Света, // о умножении любви и истины в наших сердцах.

Слава, глас 8-й:

На крылах нетрудных ума, Бога зрящаго,/ достигл еси, пристанища Небесного/ и народ, духовно израненный, / по правде Евангелия ходити научил еси, Леонтие, / воздвигув от одра болезни на путь исцельный// течения к Небесному с тобою вкупе Пристанищу

И ныне, глас той же:

Не ктому держава смертная возможе держати человеки / – Христа бо родила Дева чистая, / поправшаго Смертию смерть всесильне // и даровавшаго нам радость велию вовеки.

Тропарь, глас 1-й

Земли Пинския прозябение, / края Виленскаго процветение, / Церкви Православныя златоустый поборниче и страдальче, / нивы литовския утешение и украшение, / пастырю добрый, наставниче иноков, / преподобный исповедниче Леонтие, / моли Христа Бога // спастися душам нашим.

НА ВЕЛИЦЕЙ ВЕЧЕРНИ

Стихиры на Господи воззвах на 8, глас 8-й:

Веселися горо Афонская, / радуйся Уделе Богоматери! / Се бо инок Руськия земли/ восприя ревность святогорскую / уделом сердце свое творит Богови / небопарною молитвою чистаго сердца/ Тому и Небесной Царице кланяется и усты златыми воспевает, / наставляя в вере православней, / собою поучая попечительному житию // о Небесном Царствии неистлевающем.

Се предыде пред узники / и страдальцы за веру православную / предводитель в терпении, предшественник в святости, / новый дивный златоустый учитель и душепопечитель – / преподобный исповедник Леонтий. / Послужив бо много со дерзновением опечаленному народу нашему, / оплот Православия явися // и венец нетления унаследи.

Отче Леонтие, / велиим христианом уподобился еси неложно, / с древними истинными богословами единомыслие обретши // и венец славы о деяниях с ними восприял еси. (Дважды).

Светозарная луча земли нашея, / воссия благодать в подвизех жития твоего, Леонтие, / молитвы твоя слезныя достигоша Небеси, / дело же просвещения и Православия утверждения / освети земли наша,// да не погибнут во отступлении Отеческих учений (Дважды).

Слава, глас 5-й:

Благовествуйте пределы Пинския и Виленския радость велию / – звезда бо новая возжеся над вами: / восста Леонтий преподобноисповедник в сонме небеснем / с мучениками литовскими, Афанасием Берестейским, Андреем и Макарием Пинскими / и сияет Святей Троице сердцем верным и чистым / о Любви неизреченной Божьей вовеки // воспевающи Дивнаго во святых своих.

И ныне, Догматик, глас той же:

Вход. Прокимен дне. И чтения 3.

Стихиры, на Литии, глас 1-й, подобен: «О дивное чудо»:

О дивное чудо! / Живоносный Православия сад (/) Пинск и Вильна показуются, / се бо ныне их чадо возлюбленное, / духовный окормитель и защи́титель Православия / торжествует с Церковью Ликующей. / Тому возопиим вернии,/ веселися убо, отче Леонтие, / престали бо суть истязания и притеснения,/ и лютыя вражия озлобления // и земля блаженных тобою наследована есть.

Слава, глас 1-й:

Возрадуйтеся земнороднии, / стекошася бо ангельския соборы, / приидоша апостольския, мученическия и преподобных сонмы / восхвалити небожительнаго Леонтия, / чуднаго инока, добраго пастыря и честнейшаго архимандрита, / сей бо взыде ко Престолу Вышняго молитися / о умножении веры и любви в земле нашей бедственней, / даровании мирови мира // и душам нашим велия милости.

И ныне, глас той же:

Тя, Источниче сладчайших животворных вод, / всеутешная Палато Божия Любви,/ не смеем хвалити, ни о чем просити, грехами омраченныя, / молитвами же воспевателя Всечестнаго Успения Твоего / вонми гласу моления нашего, // да сподобит Сын Твой христианское успение во спасение нам подати.

Стихиры на стиховне, глас 1 -й:

Отче богомудре, / явился еси свещею, / мрак невежества, неверия и предательства разгоняющи, / обители иноческия созидающи и окормляющи, / благочестие житием своим в людех возгревающи. // Молися о нас, да не погибнем, во сени смертней сидящии.

Стих: Праведник, яко финикс, процветéт,/ яко кедр, иже в Ливане, умножится.

Пресвитере усерднейший,/ каждодневно Литургию совершавший,/ яко Христос ра́спятый,/ образом жития крестным привлекая к себе,/ отовсюду собирал еси кормитися на пажитях Божиих / овцы словесныя, якоже и Он. // Молися, да духовным гладом не погибнем.

Стих: Насаждéни в дому Господни,/ во дворех Бога нашего процветут.

Ныне печатныя листы трудов твоих / пред Владыкой златоценными являются, / храмы, тобою зде устроенныя, там в Чертоги Царския вменяются. / Многия скорбныя попечения о братиях / сладчайшим утешением бывают // Молися, да подражаем тебе в Богоугождении.

Слава, глас 8-й:

Отче любезнейший, / твоими трудами ниву духовную свою во сто трудов оплодоносил еси, / пустыню сердец слезами молитв возделал еси, / и обильно процвете паства / добродетельми учителя своего, / имеша бо пред собою тя яко столп, // путеводствующий в Землю Небесную.

И ныне, Богородичен, глас той же:

Не ктому держава смертная возможе держати человеки / – Христа бо родила Дева чистая, / поправшаго Смертию смерть всесильне // и даровавшаго нам радость велию вовеки.

На благословение хлебов:

Тропарь, глас 1-й

Земли Пинския прозябение, / края Виленскаго процветение, / Церкви Православныя златоустый поборниче и страдальче, / нивы литовския утешение и украшение / пастырю добрый, наставниче иноков, / преподобный исповедниче Леонтие, / моли Христа Бога // спастися душам нашим.

На Утрени

На Бог Господь: тропарь (дважды). Слава и ныне,
Богородичен:

По 1-м стихословии седален, глас 8–й.

Имже образом желает елень на источницы водныя, сице упова душа твоя, свя́те, насыщатися непрестанно Небесною Трапезою, любовию бо к Богу снедаема, не смятеся немощей телесных, послушаний многотрудных, ни поношений и истязаний лютых.

Слава, глас той же:

Каждодневно Утешение точию в Бозе имея, горе очи возводил еси, Леонтие, яко агнца заколения предал еси себе в руки мучивших, молися, исповедниче преподобне, да придет помощь Божия на нас.

И ныне, глас той же:

Стой, мужайся и да крепится сердце твое, уповай на Господа и на Пречистую Матерь Его. Мы, убо, ленивые и боязливые, именем точию, не делом христиане, призовем Божие милосердие, молитвы Богородицы и преподобноисповедника Христова, да изменимся в чада Божии и обрящем живот вечный.

По 2-м стихословии седален, глас 8–й:

На крылах нетрудных ума, Бога зрящаго,/ достигл еси пристанища Небеснаго/ и народ, духовно израненный, / по правде Евангелия ходити научил еси, Леонтие, / воздвигув от одра болезни на путь исцельный // течения к Небесному с тобою вкупе Пристанищу.

Слава, глас 8–й. Подобен: Премудрости…:

Неизреченныя премудрости Боговидне почерпл еси богатство тайное, / всем источил еси любви воды, / из каменных сердец источающия слезы, / и Божественне веселящия, / отче Леонтие, / моли Христа Бога прегрешений оставление даровати // празднующим любовию святую память твою.

И ныне, глас той же:

Како престану восхваляти любовь Твою, Пречистая? / Како не поклонюся долготерпению Твоему, / озлобляемый греховными сквернами? / Не остави мене падшаго, / Кресту Сына Твоего кланятися / и Твое неоскудное милосердие непрестанно воспевати сподоби // молитвами угодника Твоего Леонтия.

По полиелéи седален, глас 4:

Скорби, изгнания и напасти терпеливно понéсл еси, / еретичныя учения отвергая со дерзновением, / правило показался еси Православия, о всех моляся/ и всем неиссякаемый источник любве Божественныя и утешения быв, / брéмя Христово лéгкое / на себе усердно, исповедниче, понесл еси.

Слава, и ныне, глас той же:

Притецем ныне к Матери Господа Вышняго и вкупе с преподобноисповедником Леонтием воспоим Заступницу Усердную: за всех бо молит Сына Своего, Христа Бога нашего, и всем творит спастися, в державный покров Ея прибегающим.

Степенна, 1-й антифон 4-го гласа.

Прокимен, глас 4-й «Честна пред Господем…». Евангелие.

По 50-м псалме стихира, глас 6:

Страдальче о Христе незлобивый / проповедниче златоустый христианстия любови, / премудрый руководителю жития братскаго, / пастырю безстрашный в лихолетие униатское, / киновийнаго жительства восстановителю, / преображения духовнаго учителю и неложный совершителю,/ преподобный исповедниче Леонтие, / моли Царя Славы, // да соблюдет нас в мире от дел неправых.

КАНОН

Песнь 1-я

Крест начертав, Моисей / впрямо жезлом Чермное море пресече, / Израилю пешеходящу; / той же обратно фараоновым колесницам, / ударив, совокупи, / вопреки написав непобедимое оружие. / Тем Христу поим, Богу нашему, яко прославися.

Ликуй Пинск, богоспасаемый граде, молитвами мучеников стоящий, в тебе бо родися, и возрасте причастник к сему Небожительному Воинству

Досточудне Леонтие, древняго рода благочестивых служителей Божиих
плодоносная отрасль, издетска утвердился еси стезями ходити Божьими.

Помощником и Покровителем измлада восприял еси, отче Леонтие, Царя небожителей и Матерь Его Пречистую, в пучине земных печалей сиротствуя, скорбями же святым сосродствуя.

Богородичен:

О Мати Пречистая, едина Надежда и Заступление наше, Столпе огненный сущим во мраце греховнем, молитвами всечестнаго исповедника Твоего проведи нас неврежденными чрез мытарства земныя и посмертныя истязания!

Ин канон:

Небесным заступлением венчался еси, архимандрите, об отце лжи и страстей осиротением, избегл бо вражия потопления, молися о нас, да не осиротеем Небесных Селений.

В волнах отступничества не погибл еси, исповедниче Христов, молитвами твоими да подвигнемся соблюдати правды евангельския, бежаще потопления заблуждениями.

Путиводи, о святче Божий, нас к Божественному пристанищу, ты бо явился еси в душе и на теле назнаменованный Крестом Христовым, жезлом проповеди схизматическое море разсекши, ведя христолюбцев к обетованному Царствию Божию.

Богородичен:

Одигитрие Святая, не остави ны, в пути земном непорочными соблюди, ходящими в законе Господнем.

Песнь 3–я

Жезл во образ тайны приемлется, / прозябением бо предразсуждает священника;/ неплодящей же прежде Церкви / ныне процвете Древо Креста / в державу и утверждение.

Умножая нескверным житием Божия дарования, утвердися сердце твое, Леонтие, токмо во Господе, видя беззакония окрест над Церковью Православною творимые, отступления и предательства.

Распинался еси душею, отче, видя апостольския заветы попираемыи, церквы православныя разграблемии, веру православную поносиму. Молися ко Господу, да избавит нас сего искушения!

Не хвалился еси, отче, Богом данною премудростию, обаче утвердился еси издетска токмо сораспятием Христу, темже многоплоден явился еси в добродетелех.

Богородичен:

Несть свят, якоже Бог наш – показа бо нам крепкую любовь, Всесилен, явися бо в милости Богородицею Отроковицею, Ея же молитвами утверди нас в сей Любви, поющих Тя, Единаго Подателя добротворения.

Ин канон:

Пред вельможи и владыки, от суда до суда аки злодей, влачим бывал еси, Леонтие, правды ради Евангельския, не отрекшися ея, молися о нас, да не оскудеют и наша сердца правды Божьей.

Был еси, Леонтие, напоен оскорблениями даже до смерти верных Православию чад, темже поучал еси неложно всех – во Христа облечемся токмо подъемши Крест.

Моли убо, отче блаженный, Господа, да подвигнемся, якоже и ты, на всяк час, крестоношением мир просвещати.

Богородичен:

Крест – Хранитель Вселенной и Красота Церкви есть, Ты же, Отроковице, уязвлялася еси сей Тайной Красоты всем житием Твоим и по нем, в державу Любви и утверждение.

Седален:

Яко соприродное ти бысть воздержание, ему же навыкл еси, отче Леонтие. Поведайте нам небо и земле, нощи слезныя и дни покаянныя, яко пречудно сила Божия в немощном телеси воссия. Молися и ныне, угодниче Христов, да обрящем милостью Его всепобедныя смирение и любовь.

Песнь 4-я

Услышах, Господи, / смотрения Твоего таинство, / разумех дела Твоя / и прославих Твое Божество.

Яко же Павел первоверховный апостол, судов пороги истоптал еси, Леонтие, за правду веры евангельския, обаче токмо во едином Кресте обрел еси ю.

Тридесяти летом не исполнившимся ти, два лета истязаша тя в каменном узилище видимыя и невидимыя враги Церкви Христовой, обаче не поклонился еси лукавому и не отреклся еси Православия.

Лютость заточения твоего и православных храмов поругание, отступниками творимыя, возмутиста Небеса, и, яко прах, гореша храмы их каменныя и Вильна вся, строения же православных не потерпеша вреда, да вразумятся безумием омраченныя.

Богородичен:

Таинство Странное виде, ужасающися, иногда пророк, мы же Тя, Рождшую Невмещаемаго небесы, славим, Дево Богородице, просяще заступления чающим Христова обновления

Ин канон:

Явился еси, убо, отче, воистину вторым Павлом, возвещая мир, имущи златыя уста благовестия и просвещения,

Да просветит Христос и наша души миром и Светом Богопознания, по твоим, святе, молитвам, ты бо, исполнившись мира, чистым сердцем узрел еси Бога.

Немощами телесными и смирением видя поругание веры отеческия возвещал еси Тайну любви Христовой Победы, молитвами твоими причастны да будем и любви, и смирению

Богородичен:

Славим Твое Воплощение, Господи, воспеваем Сосуд избранный, страшной Тайне послуживший, да молитвами Ея вовеки сподобимся воспевати Любви Божество.

Песнь 5-я

О треблаженное Древо, / на немже распяся Христос, Царь и Господь! / Имже паде древом прельстивый, / Тобою прельстився, / Богу пригвоздившуся плотию, / подающему мир душам нашим

Плач восприял еси, отче, о Церкви-Матери и о предавших ея чадех, издавши сие творение на прочтение людем, темже беззаконно мучим бывал еси в земляной яме два лета без суда и следствия вольностелюбными согражданами.

Духом кланяяся Воскресению Христову, в узах телесных держим был еси хотящими отлучити тя пасхального ликования, обаче пребыл еси, отче, победитель смерти греховныя, Христу ти присно спребывающу.

Поносим бывал еси, безчещен, от темницы в темницу два лета беззаконно влачим, адскаго моря душегубныя бури терпеливно сносил еси охристовляемою душею, отче Леонтие.

Богородичен:

Твоея, Богоневесто, славы земля исполнися,/ и к Себе святых вся лики светло привлече,/ мира сладкая оставити сих побеждающи / и получити Твоея светлости.

Ин канон:

Блажен ты еси, отче, яко соряспялся еси Христу, и, по слову Павлову, спригвоздившуся житием ко Кресту, вообразися в тебе Бог.

Никто не возможе разлучити тебе Любви Божией и Матери-Церкви Православней – ни истязания, ни оплевания, ни безчиние, молися о нас, да соблюдет Господь и наша серца в любви и вере неложно.

Крестоношéния заповедь соблюдши/ ныне со Безплотными Богу сорадуешися, / молися о нас, честную и священную память твою совершающих.

Богородичен:

Положил еси нам крепкую Любовь, Всесильне, Матерь и Деву даровавши, неизреченное бо Чудо Ею нам явися – Христос Бог, подающий мир душам вовеки.

Песнь 6-я

Воднаго зверя во утробе / длани Иона крестовидно распростер, / спасительную Страсть проображаше яве. / Тем, тридневен изшед, / премирное Воскресение прописаше / Плотию пригвожденнаго Христа Бога / и тридневным Воскресением мир просвещшаго.

Видеша отцы и братия виленския, овимже был еси предводитель, видеша православныя люди, тобою духовно питаемыя, от Бреста и Пинска, Львова и Менска, и вся Вильна – верныя и неверныя, яко пустынножителем во граде воссия, добродетельми землю нашу освящая.

Победи в тебе, отче Леонтие, Христова Любовь: никим бо не гнушался еси, обаче словом любве о Царствии Божии напоял еси обильно всех, приходивших от синагог, молельней и костелов тебе послушати.

Вси слушавшии тя услаждашася речами златыми, Леонтие, воскрешающими души из ада насилия, вражды и кровопролития.

Богородичен:

Скиния Златая, Богоотроковице, исполненная смирения, родила еси нам нетленное Сокровище, нетления дарующаго всем богатство, моли Христа Бога, да подъемлем и мы крестоношение во спасение.

Ин канон:

Сораспеншися Христу, сердце преображенное стяжал еси, преподобне, любовь точащее неложно, широкое вельми для немощных, озлобленных, страждущих и заблудших.

Молися, о нас, святче Божий, да престанет наше окаянство сердечное и да восстанем, в бездне греховней лежащии.

Иноче любоподвижный, испроси и нам у Господа веры, да преобразится житие наше истинным благочестием, Христа и Церковь Его прославляющи!

Богородичен:

Мати Божия, Молитвенница к Богу неотступная, молися о нас, да исполнимся любви и веры, присно мир просвещающих, и спасение премирное да улучим Твоими ходатайствы.

Кондак, глас 3-й:

Притецем, людие, к дивному праведнику, / яко пророки за правду гонимому, / в горниле истязаний и болезнований преподобне воспитанному, / проповеднику и защитнику веры любовию, / яко воистину златоустому, / сединами мудрости девство украсившему, / и веру отеческую до смерти неложно соблюдшему, / да ходатайствует присно ко Господу / о утверждении Церкви Божия, // и исцелении немощей наших знаемых и незнаемых.

Икос: Что, убо, принесем Господеви, чим оправдимся, грешнии, Небесное в землю обращающи, Христа присно распинающи, невозвратное время, слово и целомудрие расточающи? Ты же, угодниче Божий, Подвигоположником Христа имеющи, сокровищницу души многоценными сими исполнил еси. Молися за ны убогия, да богатства сия нетленныя обрящем!

Песнь 7-я

Безумное веление / мучителя злочестиваго люди поколеба, / дышущее прещение и злохуление богомерзкое, / обаче три отроки не устраши ярость зверская, / ни огнь снедаяй, / но противодышущу росоносному Духу, / со огнем суще, пояху: / препетый отцев и нас Боже, благословен еси

Сродником исповеднику Максиму воистину явился еси, Леонтие! Ибо и твое житие бе попирающею вражия озлобления песнию: «Боже, Благословен еси»!

Послушание пастырское обходя со дерзновением, рукописанием книг и изданием, златоустными речами ведом был еси православным и иноверцем во всей Вильни и Руси, превозносяще Господа житием своим вовеки!

Кии нищии, кии убогии и страждущии в больницах не видеша лице твое, Леонтие? Образом был еси добротворения, милосердия и послушания, творя вся, вверенное ти, и паче того, со тщанием, Господа славяще житием своим вовеки!

Богородичен:

Песнословим Богоотроковицу Нетленную, яко Купина бо древле неопальная неврежденна пребыла есть, Огнь Божественный носящи, просвещяющий сердца и созидающий души!

Ин канон:

Молитвою, благочестием, образом любоподвижным к Богоугождению был еси, архимандрите честный, молитвами твоими да восприимем ревность быти наследниками Божия Царствия.

Безумныя веления и скорби от сих презирал еси, Леонтие, любвеобильным преображенным сердцем, молися о нас, да исполнятся сердца наша любовию всепобеждающею.

Постыдешася вси во веки, делающии рабу Твоему, Господи, зло, ибо следовал Леонтий за Тобою всем сердцем, воздал обильно славу имени Твоему, в притеснениях и унижениях делами преподобными благословяще Тя вовеки!

Богородичен:

Величаем возвеличившую Господа и возрадовавшуюся о Бозе Спасе Своем, чрез Ея бо смирение родися Христос и Рай нам паки отверзе.

Песнь 8-я

Благословите, отроцы, / Троицы равночисленнии, / Содетеля Отца Бога, / пойте снизшедшее Слово / и огнь в росу претворшее / и превозносите всем жизнь подавающаго / Духа Всесвятаго во веки.

Преподобным Леонтием нощи и дни Вседержителевы воспеваются, огнь, студ и вар озлоблений попирается, инокам и пастырям истинный образ благочестия является, сим Троица Святая превозносится и вовеки благословляется!

Господа превозносите и пойте и, ибо раб Его Леонтий безстаршными деяньми покаяния Ликам Небесным сочетается и непрестанным причащением Тайн охристовляется, сим Троица Святая превозносится и вовеки благословляется!

Небо и земля дивятся, дуси и души праведных ликуют, праведный бо и смиренный Леонтий посреди вара предательства и вражды, седмерицею разженных, воспе, неврежденный, житием песнь Богохвальную во веки!

Троичен:

О, Троице Пресвятая, единосущная и нераздельная, прими исповедника Твоего о нас ходатайство, сей бо воспевая Тя делами и мольбами, истинным отроком Твоим неизжженным искушениями явися, и в заточении, и на смертном одре вопия: Боже, благословен еси!

Ин канон:

Смерть греховная побеждена есть Христом, слуга же Его Леонтий истинным чадом Его и наследником бысть. Возликовствуем душами и умы, Богоподобие таковое зряще!

Душа распятая, измученное житием тело оставльши, к возжеленному Отечеству взыде с песнию привычнаго Богославия, Святым Духом легце возносимая.

Еще в телеси обитающи, непрестанно молитвою воспева непрестанно душа твоя, святе, Жизнь Подающему Богу: «благословен еси, Господи, пойте, и превозносите Его вовеки»!

Богородичен:

Мати Божия Марие, родила еси Невместимаго Небесы и возвеличилася еси смирением паче всех Горних Сил, темже величаем Тя с Возвеличенным вовеки!

Песнь 9-я

Таин еси, Богородице, рай, / невозделанно возрастивший Христа, / Имже Крестное Живоносное на земли насадися Древо; / тем, ныне возносиму, / покланяющеся ему, Тя величаем.

Воссия нам паки звезда Божия, николиже заходившая, обаче много времени сокрытая от нас, преподобный исповедник Христов Леонтий! Молитвы его да направят души наша в Горний Иерусалим!

Сей пречестный учитель Церковь Виленскую, во благочестии озябшую, возгре, первосажденной Церкви святыя обычаи обновив. Частыми евангельскими дождьми орошая, сотвори сию ниву Христову урожайну и плодовиту.

Благословен еси, Господи, ибо Твоим смотрением, чрез любовь и терпеливость исповедника Твоего веры православныя благочестие непорочным освидетельствовано быша и в чюжеземных, и в пограничных странах!

Богородичен:

Возрадуемся, земнороднии, и возвеличим в песнех Матерь Света, Рай Тайный, Светоносное Древо, ибо Плод родила еси, Пречистая, неложно насыщающий алчущих и жаждущих, – от века Предвозвещеннаго, Дарующаго, паче Райскаго, нетление.

Ин канон:

Воспойте, обители иноческия, воспойте, храмы Божия, подвизи добродетельнаго Леонтия! Ты же, пастырю добрый, молися, да не погибнем в непогодах лености, плод достойный Богу приносяще.

Неослабно преображающися душею, любоподвижный инок делом и словом явился еси; молися о нас, да возможе Бог и наша души небесне преобразити!

Честна пред Господем смерть преподобных Его, твоя же кончина, отче, велией печалию братии осиротевшей бысть, воистину честна пред Господем явися, молися о нас, да восприимем честное христианское успение.

Богородичен:

Величай, величай душе моя Божию Матерь, несть бо иной такой Заступницы роду христианскому, по Успении мира не оставившей и всякой просящей душе всемощно помогающей!

Светилен:

Да почтится всехвальный Леонтий, измлада бедами гонимаго Православия насыщенный, овый бо смертию в житии пожелал есть умрети для мира сего и ради овец стада Христова. Темже воистину явился есть зерном пшеницы Христовой, погибшим ради будущих всходов.

Слава и ныне, Богородичен:

Мысленную Скинию, осиявающую страну нашу Покровом Матерняго заступления, песньми величаем, яко Светлейшую Горних воинств и Рай словесный, процветший нетления Цвет.

Стихиры на хвалитех, глас 1-й:

Отче Леонтие, иноков похвало,/ крине райскаго прозябения,/ среде терния попрания заветов апостольских и озлобления / процвел еси евангельски в чистоте // красоты Божия в себе показуя и научая им.

Пострадавши всечестно, Леонтие, / явился еси удобрением добрым / семенам будущих всходов // иссеченнаго во земном отечестве твоем Православия.

Отрасле Лозы Христовой плодоносная, / Небесным Владыкой светло украшенная, / молися и нам во Христа украситися! / На тебе убо взирающи, уныние отгонится, / видим бо тя по голгофском за Христом восхождении // во Христа преображенным.

Поем, твою, Леонтие, Божественную жизнь / и славим твоих подвигов плод – / молитвы исповедническия у Престола Вышняго / и Православие процветшее в землях наших.

Слава, глас той же :

Восхвалим, братие, нетленную славу / доброделельнаго архимандрита Леонтия! / Сей бо верою яко зерно горчичное / возрасте в древо благосеннолиственное,/ собрав под сень Матери-Церкви / не токмо отрожденную им в православие Вильну, / но и Пинск, и Полоцк,/ и Менск, и Берестье, Львов, и Киев,/ и многия ведомыя и неведомыя обители и души // да вси единомысленно прославим Бога.

И ныне, Богородичен, глас той же:

Рождество Твое нетленно явися, Смерть поправши, / темже Христа моли, Богородице, воскресити // Его восстанием умершия души наша.

Молитва:

О пречудный угодниче Божий, преподобный исповедниче Леонтие!

Кто повесть исповедническия подвиги твоя о Любви Божией и Церкви Православней? Кто повесть труды твоя душевная и телесная о правоверии в земле нашей и о просвещении светом Истины народа Божьего? Скрыша веки многое от нас.

Ты воспел еси Преображение Господне и Свет Нетварный Божественный, души в Рай водворяющий. Предстани убо Богу с теплым ходатайством о воскрешении нетварным Светом от смерти греховной умов и сердец наших, да изменимся гордости, распрей и вражды, в новую тварь Божию преображающеся!

О святый Леонтие, ты непорочно воспел еси усты златыми нетленное Успение Божия Матери. Не забуди земное твое отечество в молитвах пред Матерним Ея милосердием, да успят страсти отступничества, разделения и богоборчества в земле нашей бедственной!

О честный наследниче и учителю святых отеческих преданий, а паче – Любве Божественныя! Молися, да и мы сего Божественнаго Источника причастники истинно будем, и вкупе с тобою и всеми святыми вовеки нетленнаго Источника наслаждатися сподобимся, славяще Его, Отца и Сына и Святаго Духа во веки, аминь.

Copyright © 2019 Літургічныя тэксты