(Яўр., 314 зач., VI, 13–20; Яўр., 306 зач., ІI, 11–18)
Пасля Трысвятога.
Дыякан: Будзем уважлівымі!
Свяшчэннік: Мір усім.
Чытач: І духу твайму.
Дыякан: Прамудрасць!
Чытач: Пракімен, глас 4-ты: Якія вялікія дзеі Твае, Госпадзі, / усё мудра стварыў Ты.
Хор: Якія вялікія дзеі Твае, Госпадзі, / усё мудра стварыў Ты.
Верш: Дабраславі, душа мая, Госпада; Госпадзі, Божа мой, Ты дзівосна вялікі.
Хор: Якія вялікія дзеі Твае, Госпадзі, / усё мудра стварыў Ты.
Чытач: Пракімен, глас 4-ты: Дабравесціце дзень пры дні збаўленне Бога нашага.
Хор: Дабравесціце дзень пры дні збаўленне Бога нашага.
Дыякан: Прамудрасць!
Чытач: Да Яўрэяў Паслання святога апостала Паўла чытанне.
Дыякан: Будзем уважлівымі!
Чытач: Браты, даючы абяцанне Аўрааму, Бог, паколькі не мог нікім вышэйшым паклясціся, то кляўся Самім Сабою, кажучы: “сапраўды, благаслаўляючы благаслаўлю цябе і, размнажаючы размножу цябе”. І так Аўраам, праявіўшы доўгацярплівасць, атрымаў абяцанае. Людзі клянуцца вышэйшым, і кожная спрэчка іх заканчваецца клятвай дзеля сцвярджэння. Таму і Бог, жадаючы выразней паказаць спадкаемцам абяцання нязменнасць Сваёй волі, замацаваў яго клятвай, каб у дзвюх нязменных рэчах, у якіх не можа Бог сылгаць, цвёрдае суцяшэнне мелі мы, пабегшы, каб ухапіцца за надзею, якая перад намі і якая нам для душы — нібы якар трывалы і моцны, што ўваходзіць унутр за заслону, куды як папярэднік увайшоў дзеля нас Іісус, стаўшы Першасвяшчэннікам навек па чыну Мелхіседэкаву.
Браты, Той, Хто асвячае, і тыя, што асвячаюцца, усе — ад Адзінага; таму Ён не саромеецца называць іх братамі, кажучы: “абвяшчу імя Тваё братам Маім, пасярод царквы буду апяваць Цябе”.І яшчэ: “Я буду спадзявацца на Яго”. І яшчэ: “вось Я і дзеці, якіх даў Мне Бог”. А паколькі гэтыя дзеці адзінай плоці і крыві, то і Ён таксама ўспрыняў плоць і кроў, каб смерцю пазбавіць сілы таго, хто мае ўладу смерці, гэта значыць дыявала, і вызваліць тых, якія з-за страху смерці ўсё жыццё былі падлеглыя рабству. Бо не ад Ангелаў Ён успрымае прыроду, а ўспрымае ад семені Аўраамавага. Таму Ён павінен быў ва ўсім стаць падобным да братоў, каб быць міласцівым і верным Першасвяшчэннікам перад Богам для ўміласціўлення за грахі народа. Бо паколькі Ён прыняў пакуты, Сам прайшоўшы праз выпрабаванні, то можа дапамагчы тым, хто ў выпрабаваннях.
Іерэй: Мір табе.
Чытач: І духу твайму. Алілуія, алілуя, алілуія, глас 4-ты: Умацуйся, і квітней, і царствуй, дзеля ісціны, і лагоднасці, і праўды.
Хор: Алілуія (тройчы).
Чытач: Ты ўзлюбіў праўду і ўзненавідзеў беззаконне.
Хор: Алілуія (тройчы).
Чытач: Арасіць быццам дождж рунь, / быццам кропля ападзе на зямлю
Хор: Алілуія (тройчы).
